Բժիշկ Վրեժ Շահրամանյանի հետ. սեռական անկարողություն (իմպոտենցիա). հոգեբանական պատճառները (տեսագրություն)

Յուրաքանչյուր տղամարդու սեռական կյանքում սրբության սրբոցը նրա սեռական պոտենցիան է:

Տղամարդու պոտենցիայի (էրեկցիայի) հետ կապված դժվարությունները բոլոր տարիքային խմբերում հաճախ հանդիպող գանգատներից են: Սեռական ոչ մի խանգարում տղամարդուն այնքան մեծ անհանգստություն և հուսահատություն չի պատճառում, որքան էրեկցիայի հետ կապված խնդիրները: Եթե տղամարդը չի կարողանում հասնել էրեկցիայի կամ պահպանել այն, նրան պաշարում են ամոթի և վախի զգացումները, և նա կարող է դադարել իրեն լիարժեք տղամարդ զգալուց: Տղամարդու թերարժեքության այդ զգացումի զարգացմանը մեծապես նպաստում է էրեկցիայի խանգարմանն ի սկզբանե տրված «իմպոտենցիա» ավանդական անվանումը, որը թարգմանաբար նշանակում է «ուժի, հզորության և կարողության կորուստ», քանի որ մեր հասարակության մեջ վերոնշյալ հատկանիշներին հաճախ տրվում է առնականությունը բնորոշող էական և պարտադիր բնութագրիչ դեր: Տղամարդու Ես-ը վիրավորող «իմպոտենցիա» բառը պետք է փոխարինել «էրեկցիայի դիսֆունկցիա» (ԷԴ) անվանմամբ, ինչպես և այսօր կոչում են այս խանգարումն ամբողջ աշխարհում, թեև մինչս օրս «իմպոտենցիա»-ն մնում է շրջանառության մեջ:

Ըստ վիճակագրության` աշխարհում 152 մլն տղամարդ տառապում է էրեկցիայի դիսֆունկցիայից: Յուրաքանչյուր տղամարդու համար սրբության սրբոցը սեքսուալ կյանքում նրա էրեկցիան է:

Տղամարդու սեռական պոտենցիան (էրեկցիան) բնորոշվում է առնանդամի չափերի մեծացումով և պնդության  ձեռքբերումով:

Պոտենցիայի խանգարումը սեռական գրգռման պարբերաբար  կրկնվող կամ մշտական արգելակումն է սեռական գործողության ընթացքում, որը  դրսևորվում է էրեկցիայի առաջացման կամ միչև սեռական հարաբերության ավարտը  պահպանման մասնակի կամ լրիվ անկարողությամբ: Տարբերում են պոտենցիայի խանգարման օրգանական և հոգեբանական ձևեր: Դրանց արտաքին  դրսևորումները սովորաբար նույնն են: Հաճախ շատ ուշադիր և մանրակրկիտ զրույց  է պահանջվում՝ ի հայտ բերելու այն տարբերակիչ տվյալները, որոնք կարևոր  կլինիկական նշանակություն ունեն պոտենցիայի խանգարման ձևի ախտորոշման համար: Կարևոր է  պարզաբանել յուրաքանչյուր մանրամասնություն, որը նպաստել է պոտենցիայի խանգարմանը:

Շատ հաճախ տղամարդկանց մոտ էրեկցիայի հասնելը և պահպանելը կապված է հոգեբանական գործոնների հետ: Դրանց մեջ են մտնում. դեպրեսիվ վիճակը, նևրոզը, սթրեսը, կուտակված ֆիզիկական հոգնածությունը, վատ ինքնազգացողությունը,  ընտանեկան աններդաշանակությունը և այլն: 

Երբեմն տղամարդիկ այնքան են ֆիքսվում իրենց սեռական  օրգանի ձգվածության աստիճանի վրա, որ մեկ անհաջող փորձից հետո սեռական  հարաբերությունը ընդունում են իբրև սպառնալից մի փորձություն և սկսում են  այն վերահսկել ամբողջ ակտի ընթացքում: Պոտենցիան կորցնելու վտանգը սեռական  վախի պատճառ է, որը հաճույքի անմիջական զգացողությունից ուշադրությունը շեղում է դեպի առնանդամի պրկվածության աստիճանին հետևելը:  Այս դեպքում բուժման հիմնական նպատակը կատարման  տագնապի վերացումն  է:

Տղամարդու մոտ էրեկցիայի բացակայության պատճառ են մի շարք հանգամանքներ: Օրինակ՝ ինչ-որ մեկի ներս մտնելու հավանականությունը, անհարմար դիրքը, տհաճ հոտերը, ձայները և զուգընկերուհու արտաքին տեսքը:

Սեռական անկարողության հոգեբանական պատճառ են նաև վեճերն ու գժտությունները, որոնք անցյալում տեղի են ունեցել զույգերի միջև, նրանց սեռական նախասիրությունների անհամապատասխանությունը:

Անհաջողության պատճառ կարող է լինել այն, որ տղամարդուն անհրաժեշտ է օգտագործել պահպանակ, ինչը շատերի համար անցանկալի է: Այդ դեպքում խնդիրը լուծելուն օգնության են գալիս այլ հակաբեղմնավորիչները:

Երբեմն հանդիպում է սեռական անկարողության, այսպես կոչված, ընտրողական  տեսակը, որի դեպքում տղամարդու մոտ բարդություններ են առաջանում միայն մի կնոջ նկատմամբ, այն դեպքում, երբ ուրիշ զուգընկերուհիների հետ սեռական ակտը բարեհաջող է ընթանում: Գոյություն ունի նաև հակառակ իրավիճակը, երբ տղամարդը իրեն շատ լավ է զգում իր մշտական զուգընկերուհու կամ իր կնոջ հետ, իսկ այլ կանանց հետ նրա մոտ ոչինչ չի ստացվում:

Սեռական անհաջողության պատճառ կարող է դառնալ ուժեղ սեռական ցանկությունը, ինչը հանգեցնում է նրան, որ օրգանիզմը չի դիմանում այդ լարվածությանը, էրեկցիան թուլանում է կամ՝ ընդհանրապես անհետանում:

Սեռական անկարողության հոգեբանական  նախանշաններից են.

• պոտենցիայի խանգարման հանկարծակի սկիզբը,
• առավոտյան և գիշերային էրեկցիաների պահպանումը,
• պոտենցիայի խանգարումը միայն որոշակի իրավիճակներում:

Սեռական անկարողության զարգացման ռիսկերը նվազագույնի հասցնելու համար տղամարդուն անհրաժեշտ է ապրել առողջ ապրելակերպով, այսինքն՝ ճիշտ սնվել, զբաղվել սպորտով, թողնել ծխելը և հրաժարվել ալկոհոլից, այսինքն՝ այսօրվանից մտածել վաղվա մասին:
Շարունակելի...

Վրեժ ՇԱՀՐԱՄԱՆՅԱՆ,

ԵՊԲՀ Սեքսոպաթոլոգիայի կլինիկայի բժիշկ-սեքսոպաթոլոգ, սեքսոլոգիայի  ամբիոնի դասախոս, բժշկական գիտությունների թեկնածու

Հարցեր, պատասխաններ, մեկնաբանություններ